Patuloy na pinag-aaralan at nangangalap ng ebidensya ang Food and Drug Administration (FDA) at mga vaccine expert ang pagbibigay ng kombinasyon ng bakuna para sa third dose o booster shots..
“Hindi pa ho tapos ang evaluation ng Food and Drug Administration dahil marami po tayong vaccine platforms. Compared to other countries, tayo po siguro iyong gumagamit ng ganito, pito o walong platform ng bakuna,” sabi ni Health (DOH) Undersecretary Ma. Rosario S. Vergeire.
Ayon pa kay Vergeire, nakapagsumite na ng aplikasyon para sa amended Emergency Use Authority (EUA) ang Pfizer, AstraZeneca at Sinovac para magamit ang mga ito sa third doses o boosters na ibibigay base sa mga inisyal na rekomendasyon ng World Health Organization (WHO).
“Hihintayin lng po natin iyong Emergency Use Authority at tulad ng initial recommendations po ng WHO ibibigay muna ang third doses sa mga taong may immunocompromised stage. Magbibigay ng boosters sa healthcare workers at sa senior citizens at pag-aaralan pa ho ulit pagkatapos nito kung magbibigay tayo to the rest of the population,” dagdag pa ni Vergeire.
Kinumpirma naman ni Presidential Spokesperson Secretary Harry Roque, Jr. ang nabanggit ni Vergeire base sa kanyang natunghayan sa Amerika sa pagbibigay ng boosters na hindi ito nakabase sa brand kundi condition specific.
“Naaprubahan at ipinapatupad iyong pagbibigay ng third shot sa mga immunocompromised at sa mga seniors sa lahat ng brands, hindi po na-single out ang Sinovac [dahil] kahit sa Pfizer or Moderna ay iyon ang naging desisyon ng FDA,” ani Roque.
“So, it is not brand specific iyong third shot kung hindi condition specific-sa mga A2 and A3 natin,” dagdag pa ni Roque. (MBP/PIA-IDPD)
