Umabot sa 100 pasahero ang na-stranded sa D’Sail Port Terminal sa San Agustin, Romblon matapos kanselahin ang mga biyahe ng sasakyang pandagat dahil sa malakas na hangin na dulot ng Habagat.
Sa kabuuang bilang, 11 pasahero ang nakatakdang bumiyahe patungong Sibuyan habang 89 pasahero naman ang patungong Romblon, Romblon.
Agad na kumilos ang Lokal na Pamahalaan ng San Agustin sa pangunguna ni Mayor Aaron James C. Madrona upang tugunan ang pangangailangan ng mga pasaherong pansamantalang hindi makapagpatuloy sa kanilang biyahe.
Sa pakikipagtulungan ni MDRRMO Officer Giovanni B. Fondevilla Jr., namahagi ang lokal na pamahalaan ng pagkain sa mga stranded passengers habang hinihintay ang pagbabalik ng mga biyahe.
Patuloy namang minomonitor ng lokal na pamahalaan ang lagay ng panahon at kondisyon ng mga biyahe upang matiyak ang kaligtasan at kapakanan ng mga pasaherong maaapektuhan ng kanselasyon.
Discussion about this post