Patay ang isang 48-anyos na magsasaka matapos umanong saksakin ng kanyang nakatatandang kapatid habang naghihintay sa loob ng Barangay Hall ng Barangay Bagsik, Alcantara, Romblon, para sa pag-uusap kaugnay ng kanilang alitan sa lupa noong umaga ng Agosto 5.
Ayon sa Alcantara Municipal Police Station (MPS), nagtungo sa Barangay Hall ang biktima at ang 49-anyos na suspek, isang construction worker, upang pag-usapan ang reklamong may kaugnayan sa lupa na isinampa ng biktima.
Habang hinihintay ang Officer-in-Charge na Punong Barangay, nauwi umano sa mainitang pagtatalo at suntukan ang magkapatid. Sa gitna ng komprontasyon, bumunot umano ng patalim ang suspek mula sa kanyang baywang at sinaksak ang biktima sa tiyan.
Agad na humingi ng tulong ang Barangay Treasurer, dahilan upang rumesponde ang mga nasa paligid. Naagaw ng isang barangay tanod ang patalim mula sa suspek at isinuko ito sa isang barangay kagawad para sa safekeeping.
Nilapatan ng paunang lunas ng isang Barangay Health Worker ang biktima bago isinugod sa Don Modesto Formilleza Memorial Hospital sa Looc, Romblon. Gayunman, idineklara siyang nasawi bandang alas-9:36 ng umaga. Ayon sa attending physician, ang sanhi ng kanyang pagkamatay ay hypovolemic shock secondary to a stab wound.
Agad namang inaresto ng mga rumespondeng pulis ng Alcantara MPS ang suspek sa pinangyarihan ng insidente. Narekober din ng mga awtoridad ang hinihinalang ginamit sa krimen, isang 10-pulgadang kutsilyong bakal na may plastik na hawakan.
