Sugatan ang isang 47-anyos na barangay tanod matapos umanong pagtatagain ng isang 66-anyos na lalaki sa Barangay Batiano, Odiongan, Romblon bandang 12:55 ng tanghali noong Hulyo 17.
Ayon sa biktima, wala siyang ginawang anumang malaswang hakbang bago ang insidente. Ang pahayag na ito ay sinuportahan ng asawa ng suspek, na mariing itinanggi ang alegasyong hinipuan siya ng biktima.
Sinabi ng asawa ng suspek na wala siya sa pinangyarihan nang mangyari ang pananaga kaya hindi umano totoo ang naging pahayag ng kanyang asawa sa pulisya. Naniniwala rin siyang maaaring bunga lamang ng kalasingan ng suspek ang mga sinabi nito sa mga awtoridad.
Batay naman sa imbestigasyon ng Odiongan Municipal Police Station (MPS), kapwa nag-iinuman ang biktima at ang suspek sa kubo ng huli bago naganap ang insidente. Matapos umano makainom ng dalawang bote ng gin, nakatulog ang suspek.
Nang magising, sinabi umano ng suspek sa pulisya na nakita nitong hinahawakan ng biktima ang maselang bahagi ng katawan ng kanyang asawa. Dahil dito, kumuha umano ito ng isang improvised sickle o “kawot” at ilang beses na pinagtataga ang biktima, na tinamaan sa bahagi ng mukha.
Sa kabila ng tinamong sugat, nakatakas ang biktima at humingi ng tulong sa mga kalapit na residente. Agad siyang isinugod sa Romblon Provincial Hospital upang mabigyan ng agarang lunas.
Rumesponde ang mga tauhan ng Odiongan MPS, katuwang ang Maritime Police at mga opisyal ng barangay, sa pinangyarihan ng insidente. Narekober sa suspek ang hinihinalang ginamit na kawot, na isinailalim sa dokumentasyon bilang ebidensya.
Agad ding inaresto ang suspek at ipinaalam sa kanya ang kanyang mga karapatan alinsunod sa umiiral na batas. Siya ay kasalukuyang nasa kustodiya ng pulisya habang inihahanda ang kasong Frustrated Homicide laban sa kanya.
Patuloy ang masusing imbestigasyon ng pulisya upang matukoy ang buong pangyayari at maberipika ang magkakasalungat na pahayag ng mga sangkot sa insidente.
