Patay ang dalawang sakay ng motorsiklo matapos mawalan ng kontrol ang kanilang sinasakyan at bumangga sa mga konkretong harang sa bahagi ng National Road sa Barangay San Roque, Calatrava, Romblon, noong Agosto 9.
Ayon sa Calatrava Municipal Police Station (MPS), sakay ng isang itim na Icon 110 Mitsukoshi ang hindi pa nakikilalang lalaking driver at isang babaeng backrider na residente ng Barangay Pangulo, Calatrava.
Galing umano sa San Agustin ang mga biktima nang marating ang kurbadang bahagi ng kalsada malapit sa Josefina Fetalino-Malayo Elementary School.
Batay sa paunang imbestigasyon, nawalan umano ng kontrol ang driver, na sinasabing dahil sa mabilis na takbo, at hindi nakayanan ang kurbada. Dumiretso ang motorsiklo patungo sa mga konkretong harang sa gilid ng kalsada.
Tumilapon ang dalawang sakay at nahulog sa gilid ng tubig malapit sa causeway, kung saan nagtamo sila ng malulubhang pinsala.
Agad silang isinugod sa San Andres Municipal Hospital sa San Andres para sa gamutan, ngunit idineklarang dead on arrival ng attending physician ang dalawa.
Discussion about this post