Kinilala ng University of the Philippines Alumni Association (UPAA) si Department of Science and Technology (DOST) Secretary Renato U. Solidum Jr. bilang isa sa mga 2026 UPAA Lifetime Distinguished Alumni Awardees dahil sa kanyang mahigit tatlong dekadang ambag sa agham, teknolohiya at serbisyo publiko.
Si Solidum ay tubong Odiongan, Romblon, kung saan niya ginugol ang kanyang kabataan at nagtapos ng secondary education sa dating Romblon Agricultural College, ngayon ay Romblon State University.
Si Solidum ay isang kilalang Romblomanon at alumnus ng UP Diliman College of Science, kung saan niya natapos ang Bachelor of Science in Geology noong 1984. Nagtapos din siya sa dating Romblon Agricultural College, na ngayo’y Romblon State University (RSU).
Mahigit tatlong dekada nang inilalaan ni Solidum ang kanyang karera sa pagsusulong ng agham at teknolohiya sa bansa at paglilingkod sa mga Pilipino.
Bago naging kalihim ng DOST, nagsilbi siya bilang direktor ng DOST-Philippine Institute of Volcanology and Seismology (PHIVOLCS), kung saan naging bahagi ng kanyang mga ambag ang geology, earthquake at volcano monitoring, disaster risk reduction, at public preparedness.
Naging DOST Undersecretary rin siya bago naging kalihim ng kagawaran, kung saan ipinagpatuloy niya ang pagsusulong ng science administration at national science policy.
Ayon sa DOST, patuloy na isinusulong ni Solidum ang paggamit ng science, technology, and innovation para sa isang mas ligtas, matatag at handang-harapin ang hinaharap na Pilipinas.
Ang 2026 UPAA Lifetime Distinguished Alumni Award ay isa pang pagkilala sa mahigit tatlong dekada niyang paglilingkod sa larangan ng agham at sa sambayanang Pilipino.
