Nasawi ang isang 36-anyos na babaeng rider matapos magtamo ng matinding pinsala sa salpukan ng dalawang motorsiklo sa kahabaan ng National Road malapit sa STX Site sa Sitio Agbadjang, Barangay Agpudlos, San Andres, Romblon noong Huwebes, Hulyo 30.
Kinumpirma ng mga awtoridad na binawian ng buhay ang biktima habang nagpapagamot sa Romblon Provincial Hospital, kung saan siya inilipat matapos unang maisugod sa San Andres Municipal Hospital.
Sa imbestigasyon ng San Andres Municipal Police Station (MPS), naganap ang aksidente bandang alas-3:30 ng hapon noong July 30 sa isang kurbadang bahagi ng national road.
Lumalabas sa imbestigasyon na ang 36-anyos na babae na sakay ng Honda XRM 125 ay patungong San Agustin mula Barangay Agpudlos, habang ang 19-anyos na estudyante na nagmamaneho ng Honda Click 125 ay patungong Barangay Calunacon mula sa Romblon State University–Agpudlos Campus.
Ayon sa pulisya, pagdating sa kurbadang bahagi ng kalsada ay umano’y napunta sa kabilang linya ang motorsiklo ng 19-anyos na rider, dahilan upang magbanggaan ang dalawang sasakyan.
Nagtamo rin ng mga sugat sa iba’t ibang bahagi ng katawan ang 19-anyos na rider at dinala sa San Andres Municipal Hospital upang malapatan ng lunas.
Dahil sa lakas ng banggaan, umapoy ang isa sa mga motorsiklong sangkot sa aksidente.
Nasa kustodiya na ng San Andres MPS ang dalawang motorsiklo habang nagpapatuloy ang imbestigasyon sa insidente.
Batay sa ulat ng pulisya, may hawak na valid driver’s license ang nasawing rider, samantalang walang driver’s license ang 19-anyos na rider.
