Naging pabigat sa mga residente ang hindi pa umano natatapos na Lawan-San Isidro Road Project sa Barangay San Isidro, Alcantara, Romblon dahil sa maputik at mahirap na daanan na nararanasan ng mga residente tuwing masama ang panahon at malakas ang ulan.
Isinasagawa ang proyekto ng Sunwest Construction and Development Corporation para sa Department of Public Works and Highways (DPWH). Dahil hindi pa umano ito natatapos, nananatiling hindi maayos ang bahagi ng road opening project sa Ilaya Zone 1, na nagiging maputik at mahirap daanan kapag umuulan.
Ayon sa residenteng si Arcelo Tan, nagsumite na siya ng urgent request letter sa kalihim ng DPWH upang hilingin ang agarang pagkumpleto ng Lawan-San Isidro Road Project.
Bukod sa hirap sa pagbiyahe, ikinababahala rin ng mga residente ang posibleng epekto ng kondisyon ng proyekto sa kanilang mga kabahayan at paligid tuwing malakas ang pag-ulan.
Umaasa ang mga residente ng Ilaya Zone 1 na agad na maipagpapatuloy at makukumpleto ang proyekto upang matugunan ang problema sa daanan at matiyak ang mas ligtas at maayos na pagbiyahe, lalo na tuwing panahon ng malakas na pag-ulan at bagyo.
