Sumailalim sa Skills Training on Bread and Pastry Production ang mga exiting beneficiaries ng Pantawid Pamilyang Pilipino Program (4Ps) sa Calatrava, Romblon noong Agosto 4, bilang bahagi ng pagpapatuloy ng suporta sa mga pamilyang nakapagtapos na sa programa.
Isinagawa ang pagsasanay sa ilalim ng Resolution on the Adoption and Extension of Socio-Economic Services to 4Ps Beneficiaries Who Exited the Program, na naglalayong maipagpatuloy ang mga serbisyong makatutulong sa mga dating benepisyaryo upang makapagtatag ng mas matatag na kabuhayan.
Pinondohan ng Lokal na Pamahalaan ng Calatrava ang pagsasanay upang madagdagan ang kaalaman at kasanayan ng mga kalahok sa bread and pastry production na maaari nilang gamitin bilang pagkakakitaan o dagdag na livelihood activity.
Matapos ang training, nakatanggap din ang bawat kalahok ng starter kit bilang panimulang kagamitan para sa kanilang livelihood activities.
Kabilang sa mga lumahok sina Jocelyn Casimero at Leah Fernando, na kapwa nagsabing nakatulong ang pagsasanay bilang dagdag na kaalaman at oportunidad upang makapagsimula o makapagpatuloy ng pagkakakitaan.
Pinangunahan ang pagsasanay ng trainer na si Leilanie F. Reandelar, sa pakikipagtulungan ng DSWD MIMAROPA, Lokal na Pamahalaan ng Calatrava at Municipal Social Welfare and Development Office (MSWDO).
Ayon sa DSWD MIMAROPA, ipinapakita ng programa na hindi nagtatapos sa graduation sa 4Ps ang suporta sa mga pamilyang nakalabas na sa programa, sa pamamagitan ng patuloy na convergence ng iba't ibang ahensya at lokal na pamahalaan para sa kanilang socio-economic development.
