Inatasan ni Pangulong Ferdinand R. Marcos Jr. ang Department of Health (DOH) na paigtingin ang pagbabantay at agarang pagtugon sa mga posibleng kaso ng dengue at leptospirosis, gayundin sa iba pang sakit na maaaring lumaganap sa mga lugar na naapektuhan ng masamang panahon.
Ayon kay Presidential Communications Office Undersecretary at Palace Press Officer Claire Castro, pinagana ng DOH ang leptospirosis at dengue fast lanes sa lahat ng kanilang ospital at BUCAS centers bilang tugon sa direktiba ng Pangulo.
Binigyang-diin ni Marcos na kailangang maging handa ang mga ospital sakaling tumaas ang bilang ng mga kaso ng dengue at leptospirosis sa mga lugar na naapektuhan ng pagbaha at malakas na pag-ulan.
Nakapag-preposition na rin ang pambansang pamahalaan ng mga gamot na maaaring ipamahagi sa mga lokal na pamahalaan, habang nakahanda ang mga health emergency response team para i-deploy sa mga evacuation center.
Kabilang sa mga emergency commodities na nakahanda ang chlorine tablets, malinis na inuming tubig, doxycycline, iba pang gamot, hygiene kits at micronutrient supplements.
Inatasan din ng Pangulo ang mga kinauukulan na tiyakin ang kaligtasan at kapakanan ng mga barangay health worker na patuloy na nagbibigay ng serbisyo kahit dumaraan sa baha at putik upang maabot ang mga residenteng nangangailangan ng tulong.
Tiniyak din ng DOH na sapat ang suplay ng breast milk sa mga DOH hospital para sa mga bagong silang na sanggol.
Samantala, may ₱44 milyon na inilaan ang pamahalaan para sa health emergency commodities at response supplies ng DOH na nakahanda para sa distribusyon sa Ilocos, Cagayan Valley, Central Luzon, Calabarzon, MIMAROPA at Bicol, na kabilang sa mga rehiyong naapektuhan ng masamang panahon.
Patuloy namang minomonitor ng pamahalaan ang kalagayan ng mga komunidad na naapektuhan ng pagbaha at iba pang epekto ng masamang panahon upang agad na matugunan ang kanilang pangangailangang pangkalusugan.
Discussion about this post