Anim na bayan sa Romblon ang nakaranas ng pagbaha dahil sa tuloy-tuloy na malakas na pag-ulan na pinalakas ng Habagat at Bagyong Dolphin nitong Sabado, Agosto 8.
Kabilang sa mga bayang nakaranas ng pagbaha ang Odiongan, San Andres, Ferrol, Looc, Alcantara, at Santa Fe, kung saan ilang kalsada at mabababang lugar ang binaha dahil sa patuloy na pag-ulan.
Dahil sa pagtaas ng tubig-baha, nagsagawa ng pre-emptive evacuation ang mga awtoridad sa ilang lugar sa Odiongan, Looc at Alcantara.
Sa Barangay Madalag, Alcantara, limang miyembro ng isang pamilya ang inilikas ng Philippine Coast Guard (PCG) kaninang madaling araw matapos bahain ang kanilang lugar. Pinangunahan ito ng Coast Guard Sub-Station (CGSS) Looc at Coast Guard Mobile Post (CGMP) Alcantara, katuwang ang Alcantara Municipal Police Station at Bureau of Fire Protection (BFP).
Samantala, tatlong pamilya na binubuo ng 11 indibidwal ang inilikas mula sa Sitio Maligaya Riverside, Barangay Poblacion, Looc. Pinangunahan ang operasyon ng CGSS Looc, katuwang ang Municipal Disaster Risk Reduction and Management Office (MDRRMO), Looc MPS at BFP.
Sa Barangay Tulay, Odiongan, 12 residente mula sa tatlong pamilya ang ligtas na inilikas bandang alas-1 ng madaling araw dahil sa patuloy na pagtaas ng tubig-baha. Pinangunahan ang operasyon ng CGSS Odiongan kasama ang MDRRMO Odiongan, BFP, Provincial Mobile Force Company at Odiongan MPS.
Nakapagtala rin ng landslide sa Santa Fe at Magdiwang, habang sa San Jose, isang poste ang bumuwal dahil sa masamang panahon, dahilan upang mawalan ng suplay ng kuryente ang dalawang barangay.
Samantala, nakaranas din ng power interruption sa maraming lugar sa Tablas Island simula pa kagabi dahil sa masamang lagay ng panahon.
Patuloy namang minomonitor ng mga lokal na pamahalaan at mga response agency ang sitwasyon sa iba't ibang bahagi ng lalawigan at nagsasagawa ng kaukulang hakbang upang matiyak ang kaligtasan ng mga residente.
