Opisyal nang sinimulan ngayong araw ang Marble Festival, ang taunang selebrasyong nagbibigay-pugay sa sining ng pag-ukit ng marmol.
Binuksan ang festival sa pamamagitan ng isang marble exhibit na tampok ang mga likha ng mga Romblomanong iskultor, pati na rin ang mga gawa ng mga kabataang artist. Nahahati ang mga kompetisyon sa Carving, Jewelry, at New Design Categories, na layong ipakita ang malikhaing talento sa iba’t ibang aspeto ng pag-ukit ng marmol.
Pinangunahan ng mga opisyal ng probinsya, kabilang sina Governor Jose Riano at Vice Governor Arming Gutierrez, ang seremonya ng pagbubukas na ginanap sa Romblon Shopping Center.
Dumalo ang maraming residente at bisita upang saksihan ang tradisyunal na pagtatanghal, ribbon-cutting, at pagpapasinaya ng mga exhibit.
Sa pahayag ni Governor Riano, binigyang-diin niya ang kahalagahan ng Marble Festival sa pagpapalakas ng lokal na turismo at ekonomiya, lalo na sa industriya ng marmol na kilala ang Romblon.
Ayon kay Joey Rivero, isang iskultor na nagwagi sa Carving Category, “Maganda ang ganitong uri ng paligsahan kasi mahahasa ‘yung mga galing namin at naipapakita ang mga talento naming natatago.”
Sa pagtatapos ng seremonya, iniwang buhay ang mensahe ng pagkakaisa, pagkamalikhain, at pagmamalaki sa kulturang Romblomanon—isang pamana na simbolo ng husay sa sining ng marmol at puso ng bawat mamamayan.
