Isang 25-anyos na lalaki ang agad na inaresto ng Philippine National Police matapos umanong gilitan sa leeg ang isang 55-anyos na lalaki noong hapon ng Mayo 26 sa Barangay Gutivan, Cajidiocan.
Ayon sa inisyal na imbestigasyon ng Cajidiocan Municipal Police Station, nagwala umano ang suspek matapos matalo ang kanyang basketball team sa isang laro sa lugar.
Hinabol umano ng suspek ang mga nakalaban nilang manlalaro ngunit wala itong inabutan. Sa halip, nakita nito ang biktima na wala namang kinalaman sa laro at doon umano ibinuhos ang galit.
Batay sa ulat ng pulisya, walang sabi-sabing inakbayan ng suspek ang biktima bago ito ginilitan sa leeg.
Nagtamo ang biktima ng tinatayang 15-sentimetrong sugat sa leeg at agad itong isinugod sa pinakamalapit na ospital kung saan patuloy na nilalapatan ng lunas.
Agad namang rumesponde ang mga pulis ng Cajidiocan MPS sa pangunguna ni Police Senior Master Sergeant Junar Gabilo matapos makatanggap ng tawag hinggil sa insidente.
Naaresto ang suspek sa isinagawang follow-up operation at kasalukuyang nasa kustodiya ng pulisya.
Nahaharap ang suspek sa kasong frustrated murder at nakatakdang dalhin sa Romblon Provincial Prosecutor’s Office para sa inquest proceedings.
Sa isinagawang record verification ng pulisya, napag-alamang may mga nakabinbin ding kaso ang suspek sa ibang lugar kabilang ang kasong murder sa Antipolo City Regional Trial Court Branch 144, paglabag sa Republic Act No. 9165 kaugnay ng buy-bust operation sa Antipolo City, at bench warrant para sa kasong alarms and scandal kaugnay ng Republic Act No. 10591 na inisyu sa Marikina City noong Mayo 11, 2026 na may inirekomendang piyansang ₱120,000.
