Pormal nang inihain ni Congressman Eleandro Jesus F. Madrona bilang chairperson ng Technical Working Group (TWG) sa Committee on Transportation ang substitute bill na naglalayong amyendahan ang Republic Act No. 9993 o Philippine Coast Guard Law of 2009.
Ang substitute bill ay kapalit ng 14 na magkakahiwalay na panukala at bunga umano ng malawakang deliberasyon sa ilang Kongreso kasama ang iba’t ibang ahensya at stakeholders.
Kabilang sa mga pangunahing probisyon ng panukala ang pagtatatag ng Philippine Coast Guard Academy, pagpapalakas ng organizational structure at personnel policies ng Philippine Coast Guard, pagpapalawak ng benepisyo para sa mga tauhan at kanilang pamilya, at pagbibigay ng fiscal powers sa ahensya.
Layunin din ng mga reporma na higit pang mapalakas ang kakayahan ng Philippine Coast Guard sa pagpapatupad ng maritime safety, maritime security, at environmental protection sa bansa kabilang ang pangangalaga sa pambansang interes sa West Philippine Sea.
Ayon sa tanggapan ni Congressman Madrona, inaprubahan ng Committee on Transportation ang panukala subject to style at posibleng amendments matapos ang mga isinagawang talakayan.
May ilan pang karagdagang inputs at clarifications na hinihintay mula sa Philippine Coast Guard kaugnay ng posisyon ng Philippine Ports Authority at Maritime Industry Authority hinggil sa ilang probisyon ng panukala.
Discussion about this post