Arestado ang isang 37-anyos na lalaki matapos maaktuhan sa isinagawang buy-bust operation ng Philippine National Police at Philippine Drug Enforcement Agency sa Barangay Ligaya, Odiongan, Romblon dakong alas-11:00 ng umaga noong May 17.
Kinilala ng pulisya ang suspek bilang isang jobless at newly identified street-level individual (SLI) drug personality na residente ng Barangay Pato-o, Odiongan.
Ayon sa Romblon Police Provincial Office, nagsagawa ng joint anti-illegal drug operation ang Odiongan Municipal Police Station–Municipal Drug Enforcement Unit katuwang ang PDEA Romblon na nagresulta sa pagkakaaresto ng suspek.
Sa isinagawang operasyon, nakabili umano ang poseur buyer ng isang heat-sealed transparent plastic sachet na naglalaman ng hinihinalang shabu kapalit ng ₱1,000 marked money. Narekober din mula sa suspek ang isa pang sachet na naglalaman ng hinihinalang ilegal na droga.
Tinatayang may kabuuang timbang na 0.4 gram ang mga nakumpiskang hinihinalang shabu na may tinatayang halaga na ₱3,000 base sa Dangerous Drugs Board valuation.
Dinala ang mga nakuhang ebidensya sa Romblon Provincial Crime Laboratory Office para sa pagsusuri habang sumailalim naman sa physical examination ang suspek bago isinailalim sa kustodiya ng Odiongan MPS.
Inihahanda na ng pulisya ang kasong paglabag sa Sections 5 at 11, Article II ng Republic Act 9165 o Comprehensive Dangerous Drugs Act of 2002 laban sa suspek.
