Arestado ang isang lalaking kabilang sa Most Wanted Persons ng bayan ng Numancia, Aklan matapos ang isinagawang joint law enforcement operation sa Sitio Talaba, Barangay Taclobo, San Fernando noong umaga ng Mayo 29.
Pinangunahan ng mga tauhan ng Numancia Municipal Police Station ng Aklan Police Provincial Office ang operasyon sa koordinasyon ng San Fernando Municipal Police Station at 3rd Platoon ng Romblon Provincial Mobile Force Company.
Naaresto ang suspek sa bisa ng warrant of arrest na inilabas noong Mayo 25, 2026 ni Judge Maria Margarita Estrada Matutinao ng Regional Trial Court Branch 5 sa Kalibo, Aklan.
Nahaharap ang suspek sa kasong frustrated murder sa ilalim ng Revised Penal Code. Nakasaad sa warrant ang inirekomendang piyansang ₱200,000 para sa pansamantalang paglaya nito.
Matapos ang pagkakaaresto, dinala ang suspek sa San Fernando Municipal Police Station para sa dokumentasyon at kaukulang disposisyon bago ito i-turnover sa requesting police unit.
Pinuri naman ni Col. Rexton F. Sawi, hepe ng Romblon Police Provincial Office, ang mga operatibang nagsagawa ng operasyon at binigyang-diin ang kahalagahan ng koordinasyon sa pagitan ng mga police unit sa pagpapatupad ng mga warrant of arrest.
Ayon sa Romblon Police Provincial Office, bahagi ang operasyon ng patuloy na kampanya ng kapulisan laban sa mga wanted person at sa pagpapatupad ng batas sa lalawigan.
Discussion about this post