Nadagdagan pa ng 11 munisipalidad sa lalawigan ng Romblon ang mga ginawaran ng prestihiyosong Balangay Seal of Excellence ng Philippine Drug Enforcement Agency (PDEA) matapos mapanatili ang kanilang drug-cleared status sa ilalim ng Barangay Drug Clearing Program (BDCP).
Ayon kay Assistant Regional Director ng PDEA na si Irvin John Coderis, mahalagang mapanatili ng bawat bayan ang pagiging drug-free sa pamamagitan ng mas pinaigting na preventive education, pagpapalakas ng rehabilitation programs, at pagpapalawak ng community involvement mula sa iba’t ibang barangay.
Sinabi rin ni Coderis na layunin ng ahensya na mas marami pang munisipalidad sa lalawigan ang makamit ang naturang parangal at mapanatili ang drug-cleared status ng mga bayan upang tuluyang maging drug-free ang buong Romblon.
Kabilang sa mga kinilalang munisipalidad ang Banton, Concepcion, Calatrava, Corcuera, Looc, Magdiwang, San Andres, Santa Maria, Santa Fe, San Jose, at San Fernando.
Samantala, nauna nang ginawaran ng parehong parangal ang mga bayan ng San Agustin, Alcantara, at Ferrol noong Hunyo 2025.
Ang Balangay Seal of Excellence ay iginagawad sa mga lokal na pamahalaan na matagumpay na nagpapatupad ng mga programa kontra ilegal na droga at nagpapanatili ng drug-cleared status sa kanilang mga komunidad.
Discussion about this post