Dalawang malalayong barangay sa lalawigan ng Romblon ang magkakaroon na ng sariling junior high school matapos ang pormal na pagpapasinaya ng Talisay Integrated School sa Calatrava at Cobrador Integrated School sa Romblon, Romblon ngayong araw, May 30.
Sa Barangay Talisay, Calatrava, matagal nang hamon para sa mga mag-aaral ang pagbibiyahe patungo sa poblacion upang makapagpatuloy ng pag-aaral sa high school. Sa pagbubukas ng Talisay Integrated School, inaasahang mas mapapalapit ang access sa secondary education para sa mga kabataan sa barangay at mga kalapit na komunidad.
Ayon kay Barangay Captain Merlito Mantes, katuparan ng matagal nang hiling ng komunidad ang pagkakaroon ng high school sa kanilang lugar. Nangako rin si Mayor Bong Fabella at ang mga miyembro ng Sangguniang Bayan ng patuloy na suporta para sa paaralan.
Samantala, sa Barangay Cobrador sa bayan ng Romblon, hindi na kinakailangang tumawid pa ng dagat ang mga mag-aaral upang makapag-enrol sa high school sa poblacion. Sa pamamagitan ng Cobrador Integrated School, maaari nang ipagpatuloy ng mga kabataan ang kanilang pag-aaral sa sariling barangay.
Nagpasalamat naman si Barangay Captain Argie Guray sa mga ahensya at opisyal na tumulong upang maisakatuparan ang pagtatatag ng paaralan. Hinikayat din nito ang mga residente na suportahan ang operasyon ng paaralan.
Sa parehong programa, sinabi ni Schools Division Superintendent Roger F. Capa na mahalagang bahagi ng pagpapalawak ng access sa edukasyon ang pagtatayo ng mga integrated school sa mga liblib na lugar. Nagpahayag din ng suporta ang mga lokal na pamahalaan ng Calatrava at Romblon, gayundin ang Pamahalaang Panlalawigan ng Romblon.
Dumalo rin sa mga programa si Romblon Congressman Eleandro Jesus “Budoy” Madrona kasama ang ilang lokal at panlalawigang opisyal.
Ang dalawang bagong paaralan ay dagdag sa Guinhayaan Integrated School sa Looc at Bunsoran Integrated School sa Ferrol na pinasinayaan naman noong Mayo 29.
Sa kabuuan, apat na bagong integrated school ang binuksan sa loob ng dalawang araw bilang bahagi ng pagpapalawak ng access sa junior high school education sa iba't ibang komunidad sa lalawigan ng Romblon.
