Nagbabala ang Philippine Coast Guard sa publiko matapos mamataan ang mga dragon thimble jellyfish sa ilang baybaying lugar sa bayan ng Romblon.
Ayon sa Coast Guard Sub-Station Romblon, nagsagawa sila ng beach patrol operations sa iba't ibang coastal areas at resorts sa munisipalidad noong Mayo 29.
Sa isinagawang inspeksyon, napansin ng mga tauhan ng Coast Guard ang presensya ng mga dragon thimble jellyfish sa ilang bahagi ng dalampasigan. Ayon sa mga awtoridad, maaaring magdulot ang mga ito ng pangangati, pantal, at iba pang skin irritation kapag nadikit sa tao.
Dahil dito, agad na nakipag-ugnayan ang Coast Guard sa mga resort operators at mga residente sa baybayin upang ipaalam ang sitwasyon at magbigay ng mga paalala para sa kaligtasan ng publiko.
Pinapayuhan ang mga residente at turista na pansamantalang umiwas sa paglangoy sa mga lugar na may naiulat na presensya ng mga jellyfish hanggang sa humupa ang kanilang pagdami.
Nauna nang naglabas ng advisory ang lokal na pamahalaan ng Romblon kaugnay ng pagdami ng thimble jellyfish sa ilang bahagi ng karagatan matapos maiulat na may mga naligo sa dagat na nakaranas ng pangangati at pantal matapos makasalamuha ang mga ito.
