Maituturing na matagumpay ang kampanya ng Soft Tennis Team ng MIMAROPA sa kasalukuyang ginaganap na Palarong Pambansa 2026 sa Agusan del Sur matapos makapag-uwi ng tatlong bronze medal ang koponang binubuo ng mga atletang mula sa lalawigan ng Romblon.
Ang MIMAROPA Soft Tennis Team ay binubuo ng mga manlalaro mula sa Odiongan National High School at Looc National High School na nagsanib-puwersa upang katawanin ang rehiyon sa kauna-unahang pagsabak ng soft tennis sa Palarong Pambansa.
Nakuha ng tambalan nina Edysone Jogie Marcelo ng Looc at Jai Carlo Fabiculana ng Odiongan ang bronze medal sa Boys Doubles Competition. Bronze medal din ang naiuwi nina Aira Azenith Mangao ng Looc at Xeylem Gado ng Odiongan sa Girls Doubles Competition.
Nakapagdagdag pa ng isa pang bronze medal si Fabiculana matapos ang kanyang matagumpay na kampanya sa Boys Singles Competition.
Ginabayan ang koponan nina Coach Jethro Garcia ng Looc at Coach J-son Dave Ramo ng Odiongan, na kapwa naging mahalagang bahagi ng paghahanda ng mga atleta para sa pambansang torneo.
Bagama’t demo sport pa lamang ang soft tennis sa kasalukuyang edisyon ng Palarong Pambansa, malaking tagumpay na para sa MIMAROPA ang makasungkit agad ng tatlong medalya sa unang taon ng kompetisyon.
Mas lalo pang nagbibigay ng pag-asa sa koponan ang katotohanang eligible pa ring makapaglaro sa susunod na taon ang lahat ng kanilang medalists. Sina Jai Carlo Fabiculana at Xeylem Gado ay mga incoming Grade 10 students pa lamang, habang sina Edysone Jogie Marcelo at Aira Azenith Mangao naman ay papasok pa lamang sa Grade 9.
Dahil dito, umaasa ang buong koponan na mas mapapaganda pa nila ang kanilang kampanya sa susunod na edisyon ng Palarong Pambansa na nakatakdang idaos sa Quezon City sa 2027.
