Isang 28-anyos na lalaki mula sa bayan ng Romblon ang nasawi dahil sa dengue, ayon sa ulat ng Romblon Provincial Health Office. Ang bayan ng Romblon ay kasalukuyang may 47 naitala na kaso ng dengue.
Sa kabuuan, umabot na sa 915 ang mga kaso ng dengue sa buong probinsya mula Enero hanggang Setyembre 3, batay sa datos ng Provincial Epidemiology and Surveillance Unit (PESU). Ang mga bayan ng San Agustin at Odiongan ang may pinakamataas na bilang ng mga kaso, na may 235 at 171 kaso, ayon sa pagkakabanggit.
Tatlong indibidwal na ang nasawi ngayong taon—isa mula sa Romblon, isa sa Cajidiocan, at isa sa San Fernando. Bagaman may mga nasawi, ayon kay Dr. Renato Menrige Jr. ng Provincial Health Office, mas mababa ang bilang ng mga namatay ngayong taon kumpara sa 11 na naitala noong 2022.
Pinaalalahanan ni Dr. Menrige Jr. ang publiko na magpatingin agad sa ospital kung makitaan ng sintomas ng dengue. Ayon sa kanya, isa sa mga dahilan ng pagkasawi ay ang pagkaantala ng pagpunta sa doktor at ang hindi pagkilala agad ng mga sintomas. Dagdag pa rito, mas mataas ang panganib sa mga may mahinang immune system o may kasamang ibang karamdaman (co-morbidities).
Hinimok din ni Dr. Menrige Jr. ang lahat na sundin ang 5S strategy ng pamahalaan upang labanan ang pagkalat ng dengue at mapanatiling ligtas ang kanilang mga pamilya. Ang 5S strategy ay kinabibilangan ng paghahanap at pagsira ng mga pinamumugaran ng lamok, pagsusuot ng mga damit na protektado laban sa kagat ng lamok, pagpapakonsulta agad kapag may sintomas, pagligtas ng sarili mula sa impeksyon, at suporta ng komunidad sa mga hakbang laban sa dengue.
