Isinusulong ng pamahalaan ang pagpapalawak ng runway ng Romblon Airport upang makapagpalapag ng mas malalaking eroplano na may mas mataas na kapasidad ng pasahero.
Ito ang inihayag ni Romblon Representative Eleandro Jesus Madrona kasabay ng pagbubukas ng bagong ruta ng barko sa Malbog Port sa Looc, kung saan ibinahagi niya ang mga planong pagpapalakas ng transport connectivity ng lalawigan.
Ayon kay Madrona, may commitment ang Department of Transportation (DOTr) na palawigin ang runway ng paliparan hanggang 2.2 kilometro upang payagan ang paglapag ng mga turbofan jet aircraft.
Dagdag pa ng kongresista, nailipat na sa pamahalaang panlalawigan ang pondo para sa site acquisition o pagkuha ng karagdagang lupang kakailanganin sa proyekto.
May nakalaan din umanong karagdagang P100 milyon na ipagkakaloob sa probinsya para sa pagpapalawak ng runway at paglilipat ng passenger terminal sa gitnang bahagi ng paliparan alinsunod sa plano ng Civil Aviation Authority of the Philippines (CAAP).
Ang hakbang na ito ay bahagi ng mas malawak na programa ng DOTr sa ilalim ni Transportation Secretary Giovanni Lopez na pahabain ang mga runway ng ilang regional airport sa bansa upang maging handa sa paglapag ng mas malalaking jet aircraft at mapalakas ang konektibidad ng mga lalawigan.
Ipinaliwanag ni Madrona na sa kasalukuyan ay limitado ang mga eroplanong maaaring bumiyahe patungong Romblon dahil sa haba ng runway, dahilan upang turboprop aircraft lamang ang karaniwang makapagserbisyo sa ruta.
Umaasa naman ang kongresista na sa oras na maisakatuparan ang runway extension ay makapaglilingkod na sa lalawigan ang mas malalaking eroplano na may kapasidad na nasa 150 hanggang 180 pasahero, na inaasahang makakatulong sa pagpapababa ng pamasahe at pagpapalakas ng turismo at ekonomiya ng Romblon.
