Naghahanda na ang Santa Maria Municipal Police Station (MPS) para sa pagpapatupad ng seguridad sa mga aktibidad ng Niyogisdaan Festival 2026, ayon kay Chief of Police PMAJ Francis Rey Manito.
Sa panayam, sinabi ni Manito na nakahanda na ang mga kapulisan upang magbigay ng seguridad sa mga aktibidad na gaganapin sa loob ng ilang araw bilang bahagi ng pagdiriwang ng pista ng bayan.
Ayon sa kanya, wala naman silang nakikitang partikular na banta sa seguridad kaugnay ng pagdiriwang, ngunit mananatiling nakaalerto ang mga tauhan ng pulisya upang matiyak ang kaayusan at kaligtasan ng mga residente at mga bisita.
Nakatutulong din umano sa pagpapatupad ng seguridad ang paglipat ng Santa Maria MPS sa bagong lokasyon na mas malapit sa Covered Court, kung saan isasagawa ang ilan sa mga pangunahing aktibidad ng festival.
Dahil dito, mas magiging mabilis umano ang pagtugon at mas madali para sa mga kapulisan na magbantay at magpatrolya sa paligid ng mga lugar na pagdarausan ng mga aktibidad.
Patuloy namang nakikipag-ugnayan ang Santa Maria MPS sa lokal na pamahalaan at iba pang katuwang upang matiyak ang maayos at ligtas na pagdaraos ng Niyogisdaan Festival 2026.
Discussion about this post