Umabot na sa 11,923 bata sa lalawigan ng Romblon ang nabakunahan laban sa tigdas at tigdas-hangin sa ilalim ng nagpapatuloy na Measles-Rubella Supplemental Immunization Activity (MR-SIA), ayon sa datos ng Department of Health (DOH) MIMAROPA hanggang alas-7:00 ng umaga noong Agosto 21.
Katumbas ito ng 46.07 porsiyento ng target na 25,881 batang edad anim hanggang 59 buwang gulang na layong mabakunahan sa buong lalawigan.
Sa walong bayan na nakapaloob sa inilabas na datos, Looc ang may pinakamataas na vaccination coverage na 53.77 porsiyento, kung saan 962 sa target na 1,789 bata ang nabakunahan.
Sinundan ito ng Alcantara na may 53.46 porsiyento o 765 sa target na 1,431 bata, at Concepcion na may 53.33 porsiyento o 120 sa target na 225 bata.
Nakapagtala naman ang Banton ng 164 nabakunahan mula sa target na 336 o 48.81 porsiyento, habang 294 sa 628 target na bata sa Corcuera ang nabakunahan, katumbas ng 46.82 porsiyento.
Sa Calatrava, umabot sa 470 ang nabakunahan mula sa target na 1,020 o 46.08 porsiyento. Samantala, 216 sa target na 700 bata sa Ferrol ang nabakunahan, katumbas ng 30.86 porsiyento, habang Cajidiocan ang may 605 nabakunahan mula sa target na 2,056 o 29.43 porsiyento.
Bukod sa pagbabakuna laban sa tigdas at tigdas-hangin, 11,627 bata na rin ang nabigyan ng Vitamin A supplementation, o 44.92 porsiyento ng kabuuang target.
Patuloy ang MR-SIA sa buong Romblon upang maabot ang mga batang edad 6 hanggang 59 buwang gulang at maprotektahan sila laban sa measles at rubella.
Hinimok ng mga health authorities ang mga magulang at tagapag-alaga na dalhin ang kanilang mga anak sa pinakamalapit na fixed o temporary vaccination post hanggang Agosto 28, 2026, may vaccination record man o wala.
Katuwang ng programa ang mga health workers, lokal na pamahalaan at iba pang partner agencies upang mailapit ang serbisyong pagbabakuna sa mga komunidad.
