Malugod na tinanggap ni Romblon Rep. Eleandro Jesus F. Madrona ang pahayag ni Senate President Sherwin Gatchalian na inaasahang maipapasa ng Senado ngayong taon ang panukalang batas para sa pag-aalis ng travel tax.
Si Madrona, na chairman ng House Committee on Tourism, ay nagsabing magandang balita ito para sa milyun-milyong Pilipinong nangangarap at nagpaplanong makapaglakbay sa ibang bansa.
Ayon sa kongresista, maraming pamilyang Pilipino, kabilang ang mga manggagawang sumasahod, ang matagal na nag-iipon upang magkaroon ng pagkakataong makapagbakasyon sa ibang bansa o makadalaw sa kanilang mga kamag-anak at kaibigan.
“For them, traveling abroad is a dream, which they achieve by saving whatever they can from their income. The abolition of the travel tax will make it easier for them to realize this dream,” ani Madrona.
Sinabi niya na ang pag-alis ng travel tax ay makatutulong sa mga Pilipinong biyahero sa pamamagitan ng pagbawas sa gastusing kinakailangan bago makalipad patungo sa ibang bansa.
Dagdag pa ni Madrona, inaasahang makikinabang dito ang milyun-milyong Pilipino at maaari rin itong makahikayat sa mas marami pang mamamayan na bumiyahe sa ibang bansa.
Batay sa datos ng Department of Tourism na binanggit ng kongresista, umabot sa 7.6 milyon Pilipino ang bumiyahe palabas ng bansa noong 2025.
Ang House Committee on Tourism ay kabilang sa mga sumusuporta sa mga hakbang na naglalayong gawing mas abot-kaya ang paglalakbay para sa mga Pilipino.
