Patay ang isang 33-anyos na babae matapos masalpok ng isa pang motorsiklo na minamaneho umano ng isang lasing na rider sa Cahawagan-Cabalian Road, Sitio Cahawagan, Barangay Tabugon, Santa Fe, Romblon, bandang alas-5:08 ng hapon noong Agosto 14.
Ayon sa paunang imbestigasyon ng Santa Fe Municipal Police Station (MPS), sakay ang biktima ng black-and-yellow Rusi Bantul 110 at patungo umano sa paaralan upang sunduin ang kanyang mga anak.
Samantala, isang 51-anyos na lalaki ang nagmamaneho ng black Suzuki Dominar 400cc na may 37-anyos na lalaking angkas. Pareho silang patungo sa kabilang direksiyon.
Lumalabas sa imbestigasyon na biglang lumipat ng linya ang lalaking rider at umabot sa linya ng paparating na motorsiklo ng biktima, na nagresulta sa salpukan ng dalawang motorsiklo.
Batay sa ulat, pinaniniwalaang nasa impluwensiya ng alak ang driver at angkas ng Dominar at pauwi na umano ang mga ito matapos uminom sa isang barangay.
Agad na isinugod sa pagamutan ang lahat ng sangkot sa aksidente. Gayunman, idineklarang dead on arrival bandang alas-6:25 ng gabi ang 33-anyos na rider.
Nagtamo naman ng malubhang pinsala ang lalaking driver, habang minor injuries naman ang tinamo ng kanyang angkas.
Patuloy ang imbestigasyon ng mga kapulisan upang matukoy ang buong pangyayari at pananagutan kaugnay ng aksidente.
