Siyam na aplikante ang hired on the spot sa isinagawang job fair ng Technical Education and Skills Development Authority (TESDA) sa Odiongan Covered Court nitong Agosto 19 bilang bahagi ng World Café of Opportunities (WCO).
Kabilang sa mga kumpanyang naghahanap ng mga kwalipikadong aplikante ang Unified Romblon Contractors Association, El Elohe Group of Companies, Romblon State University, Fast Services Corporation, Powerfoods, iPlay Marketing Inc., Mitsukoshi at Dream Paradise.
Iba't ibang posisyon ang iniaalok sa job fair, kabilang ang marketing assistants, security guards, safety officers, front desk officers, heavy equipment operators at iba pang skilled workers. May mga oportunidad din sa government positions sa Romblon State University at construction-related jobs sa mga lokal na contractor.
Kaisa rin sa WCO ang iba't ibang ahensya ng pamahalaan na naglatag ng kani-kanilang booth upang matulungan ang mga aplikante sa pagkuha ng kinakailangang dokumento at iba pang serbisyo kaugnay ng kanilang paghahanap ng trabaho.
Tampok din sa aktibidad ang skills demonstration ng mga nagsipagtapos sa TESDA, sa pangunguna ng Provincial Training Center at iba pang Technical-Vocational Institutions (TVIs).
Ipinakita ng mga graduates ang kanilang mga natutuhang kasanayan, kabilang ang paggawa ng tocino at housekeeping towel art, bilang pagpapakita ng kanilang kakayahan matapos sumailalim sa technical-vocational training.
Nagsagawa rin ng ceremonial distribution ng toolkits para sa 240 graduates ng iba't ibang technical-vocational programs ng TESDA sa ilalim ng Special Training for Employment Program (STEP).
Layunin ng mga toolkit na mabigyan ang mga graduates ng mga kagamitang maaari nilang gamitin sa kanilang natutuhang skills upang makatulong sa kanilang paghahanap ng trabaho o pagsisimula ng sariling kabuhayan.
Isinagawa ang aktibidad kasabay ng 32nd anniversary ng ahensya na ginugunita ngayong buwan.
