Dalawampu’t isang persons with disabilities (PWDs) mula sa mga bayan ng Magdiwang, Cajidiocan, at San Fernando sa Sibuyan Island ang sumailalim sa casting at measurement para sa libreng prosthetic arms at legs.
Isinagawa ang aktibidad sa tatlong bayan bilang tugon sa pangangailangan ng mga PWD na magkaroon ng prosthetic limbs na angkop sa kanilang kondisyon at pang-araw-araw na pangangailangan.
Naisakatuparan ang programa sa inisyatiba ni Romblon Governor Trina Alejandra Firmalo-Fabic, sa suporta ni Sen. Erwin Tulfo, at sa pakikipagtulungan ng Department of Social Welfare and Development (DSWD) MIMAROPA–SWAD Office Romblon, Provincial Persons with Disability Affairs Office (PDAO), at OrthoFit Enterprises OPC.
Sa kabuuan, tigpitong PWD beneficiaries mula sa tatlong bayan ang sumailalim sa proseso ng casting at measurement upang matiyak na ang mga prosthetic arms at legs na gagawin para sa kanila ay akma sa kanilang pangangatawan at partikular na pangangailangan.
Sa pamamagitan ng programa, layunin ng Pamahalaang Panlalawigan ng Romblon at mga katuwang nitong ahensya na mabigyan ng karagdagang suporta ang mga PWD sa kanilang pagkilos, pagsasagawa ng pang-araw-araw na gawain, at pagkakaroon ng mas aktibo at produktibong pamumuhay.
Discussion about this post