Sa nalalabing ilang araw bago ang May 12 midterm elections, hinimok ng Commission on Elections (COMELEC) nitong Martes ang mga botante na magsimulang gumawa ng kanilang “kodigo” o listahan ng mga kandidatong iboboto.
“Gawin na natin ngayon ang ating ‘kodigo’. Mahirap na mamili ng 12 senador, isang party-list, at mga lokal na kandidato habang bumoboto ka na,” ayon kay Comelec Chairperson George Garcia sa isang panayam.
Bukod sa kodigo, pinaalalahanan din ni Garcia ang publiko na alamin kung saan ang kanilang voting center at partikular na presinto upang hindi malito sa araw ng halalan.
“Mahalagang alam ng bawat isa kung saang paaralan at presinto sila nakatalaga,” aniya.
Pinaalalahanan din ni Garcia ang mga botante na kumilos nang maayos habang nasa loob ng presinto. Dapat aniyang buo ang pag-shade sa oval katabi ng pangalan ng kandidatong iboboto at iwasang lagyan ng ibang marka ang balota.
Pagkatapos bumoto, inaasahan din na agad nang lalabas ng presinto ang mga botante.
Hindi na kailangan ng identification card sa pagboto ngunit mas mabuting magdala ng kahit anong ID kung sakaling hingin ito, dagdag pa ni Garcia.
Pinapayagan naman ang cellphone sa loob ng presinto ngunit mahigpit na ipinagbabawal ang pagkuha ng larawan ng balota, screen ng voting machine, at resibo ng boto.
“Hindi natin ipinagbabawal ang pagdadala ng cellphone sa loob ng presinto. Pero huwag na tayong kumuha ng larawan para sa Facebook. Igalang natin ang proseso. Bawal ang litrato ng balota, screen ng makina, at ng voter’s receipt,” ani Garcia.
Mariin din niyang pinayuhan ang publiko na umiwas sa pagtanggap ng libreng pagkain mula sa mga kandidato o partido sa araw ng halalan, at huwag magsuot ng campaign shirt sa loob ng presinto dahil ipinagbabawal na ang pangangampanya sa mismong araw ng eleksyon.
“Magpakabait tayo habang nasa loob ng presinto, kung hindi ay maari tayong i-report ng mga watchers at mapabilang sa mga kakasuhan,” babala ni Garcia.
