Patay ang isang 22-anyos na lalaki matapos mabaril ng mga pulis habang inaaresto kaugnay ng pananaksak sa kanyang ama at isang rumespondeng pulis sa Barangay Poblacion, San Jose, Romblon umaga ng June 13.
Batay sa ulat ng San Jose Municipal Police Station (MPS), nakatanggap ang mga pulis ng sumbong mula sa asawa ng unang biktima hinggil sa nagaganap na pananaksak sa kanilang tahanan bandang alas-9:30 ng umaga.
Agad na nagtungo sa lugar ang mga pulis at nadatnan umano ang suspek na sinasaksak ang kanyang ama.
Ayon sa pulisya, habang tinatangka nilang pigilan at arestuhin ang suspek, nanlaban ito at sinaksak ang isa sa mga rumespondeng pulis na 34 taong gulang.
Dahil sa sitwasyon, gumamit ng kanilang service firearm ang mga pulis at pinaputukan ang suspek.
Dinala sa pinakamalapit na pagamutan ang suspek, gayundin ang kanyang ama at ang sugatang pulis para sa agarang medikal na atensyon. Gayunman, nasawi ang suspek.
Patuloy namang nagpapagaling sa ospital ang ama ng suspek at ang pulis na nasugatan sa insidente.
Patuloy ang isinasagawang imbestigasyon ng San Jose MPS upang matukoy ang buong pangyayari at iba pang detalye kaugnay ng insidente.
