Pinalakas ng Department of Labor and Employment (DOLE) ang kakayahan ng siyam na workers' organizations sa Romblon sa pamamagitan ng dalawang araw na Workers' Organization Development Program (WODP) training upang mapahusay ang pamamahala ng kanilang mga samahan at mga proyektong pangkabuhayan.
Isinagawa ang pagsasanay sa Dobs Events Place sa Tabing-Dagat, Odiongan sa pangunguna ng DOLE Romblon, katuwang ang Romblon State University at iba pang ahensya ng pamahalaan.
Kabilang sa mga paksang tinalakay ang organizational management, financial literacy, basic accounting, occupational safety and health (OSH), business planning, workplace safety, at PhilHealth Yakap Program.
Ayon kay Luningning Mantes ng Lapiang Akma Tungo sa Pangisdaan ng Balogo (LATAB), nakatulong ang pagsasanay upang mapalawak ang kaalaman ng kanilang samahan sa wastong pamamahala at pagpapatupad ng mga proyektong pangkabuhayan.
“Malaking tulong po ang WODP Training sa aming samahan dahil sa malinaw, komprehensibo, at makatotohanang pagtalakay sa mga paksa tulad ng financial literacy, basic accounting, organizational management, at business planning. Naging labis na produktibo ang pagsasanay na ito para sa amin. Higit sa lahat, napakahalaga ng mga natutunan naming kaalaman sa OSH at first aid training upang matiyak na ligtas, handa, at matatag ang aming samahan laban sa anumang sakuna o krisis,” ani Mantes.
Samantala, hinikayat ni DOLE Romblon Officer-in-Charge Provincial Head Karen A. Bugarin ang mga kalahok na isabuhay ang mga natutunan upang higit pang mapalakas ang kanilang mga samahan sa pamamagitan ng pagtutulungan at sama-samang pananagutan.
Binigyang-diin niya na nakasalalay ang tagumpay ng mga livelihood project hindi lamang sa mga opisyal ng samahan kundi sa aktibong pakikilahok ng lahat ng miyembro sa wastong pangangasiwa at pagpapanatili ng mga ipinagkatiwalang proyekto at kagamitan.
Ayon sa DOLE, bahagi ang WODP ng patuloy na programa ng ahensya upang palakasin ang mga workers' organizations bilang katuwang sa pagsusulong ng napapanatiling kabuhayan at paglikha ng mga oportunidad sa trabaho sa mga lokal na komunidad.
Discussion about this post