Pormal na inilunsad ng Romblon Police Provincial Office (PPO) ang Project Ligtas Kalsada noong Hulyo 2 bilang bahagi ng pagpapaigting ng kampanya upang mabawasan ang road crash incidents sa lalawigan sa pamamagitan ng mas mahigpit na pagpapatupad ng batas trapiko, information campaign, at pakikipagtulungan sa iba't ibang ahensya.
Inilunsad ang programa sa bayan ng Odiongan, na nakapagtala ng pinakamataas na bilang ng road crash incidents sa Romblon batay sa datos ng Romblon PPO.
Ayon kay Police Lt. Col. Ledilyn Ambonan, Chief ng Police Community Affairs and Development Unit, ang implementasyon ng Project Ligtas Kalsada ay nakabatay sa pagsusuri ng datos ng mga aksidente sa bawat munisipalidad ng lalawigan.
Sinabi niya na tinutukoy ng pulisya ang mga barangay, araw, at oras kung kailan madalas mangyari ang mga aksidente upang doon ituon ang pagpapatupad ng checkpoint, police patrol, at police visibility.
Batay sa datos ng Romblon PPO, nakapagtala ang lalawigan ng 115 road crash incidents mula Enero hanggang Hunyo 2026, mas mababa ng 33 kaso kumpara sa 148 insidente na naitala sa kaparehong panahon noong 2025.
Bagama't nananatiling may pinakamataas na bilang ng road crash incidents ang Odiongan sa 51 kaso, bumaba ito mula sa 78 insidente na naitala noong nakaraang taon.
Ayon pa kay Ambonan, lumabas sa pagsusuri ng datos na mas maraming aksidente ang nangyayari sa Odiongan tuwing gabi, partikular tuwing Huwebes, kaya doon nakatuon ang pagpapaigting ng police operations.
Sinabi rin niya na nakatulong ang online checkpoint monitoring system ng Romblon PPO upang matiyak ang regular na pagsasagawa ng checkpoint ng mga himpilan ng pulisya sa buong lalawigan, na naging bahagi ng pagbaba ng bilang ng road crash incidents at mga biktimang dinadala sa mga ospital.
Kabilang din sa Project Ligtas Kalsada ang mas pinaigting na koordinasyon ng Philippine National Police, Highway Patrol Group (HPG), Land Transportation Office (LTO), mga lokal na pamahalaan, at iba pang stakeholder sa pagpapatupad ng traffic laws at information campaigns laban sa paggamit ng cellphone habang nagmamaneho at iba pang paglabag sa batas trapiko.
Nagpahayag din ng suporta ang mga kinatawan ng LTO Romblon, HPG, Department of Public Works and Highways (DPWH), at mga lokal na pamahalaan sa programa, at binigyang-diin ang kahalagahan ng disiplina sa kalsada at pagtutulungan ng iba't ibang sektor upang mabawasan ang mga aksidente.
Nanawagan naman si Ambonan sa mga motorista at publiko na makiisa sa Project Ligtas Kalsada sa pamamagitan ng pagsunod sa mga batas trapiko at responsableng paggamit ng kalsada.
Aniya, layunin ng programa na maisulong ang kultura ng disiplina sa kalsada sa buong lalawigan at mabawasan ang bilang ng mga aksidenteng nagdudulot ng pinsala at pagkasawi.
Discussion about this post