Ayon kay Municipal Nutrition Action Officer (MNAO) Nigel David, nakatuon ang programa sa pagbibigay ng mga serbisyong pangkalusugan at nutrisyon sa mga buntis hanggang sa umabot sa dalawang taong gulang ang kanilang anak.
Sinabi ni David na sinisiguro ng lokal na pamahalaan na nakatatanggap ang mga buntis ng kumpletong prenatal checkups, mga kinakailangang bakuna, bitamina, at nutrition education upang mapanatili ang kalusugan ng ina at ng sanggol.
“Sinisiguro natin na kumpleto ang prenatal checkups, bakuna, bitamina, at education campaign para sa mga nanay upang mabigyan ng magandang simula ang kanilang mga anak,” ani David.
Hinihikayat din ng programa ang exclusive breastfeeding sa pamamagitan ng pagbibigay ng impormasyon sa mga buntis at bagong panganak tungkol sa kahalagahan nito sa nutrisyon at kalusugan ng sanggol.
Bilang insentibo, namamahagi rin ang lokal na pamahalaan ng maternity kits na naglalaman ng mga pangunahing pangangailangan ng ina at sanggol sa mga buntis na nakatapos ng kanilang prenatal consultations.
Bukod dito, ipinatutupad din ng Odiongan ang HAPAG o Halina't Magtanim ng Prutas at Gulay Program sa lahat ng barangay kung saan nagtatatag ng mga community garden upang magkaroon ng mas madaling access ang mga residente sa mga gulay at iba pang masustansiyang pagkain.
Namamahagi rin ang pamahalaang bayan ng mga binhi ng gulay sa mga pamilyang nangangailangan upang hikayatin ang produksyon ng pagkain sa antas ng komunidad.
Ayon pa kay David, regular ding mino-monitor ng mga Barangay Nutrition Scholar ang nutritional status ng mga bata upang agad na mabigyan ng kaukulang intervention ang mga natutukoy na kulang sa timbang.
Nakikipagtulungan din ang lokal na pamahalaan sa Department of Education sa pagpapatuloy ng nutrition interventions para sa mga batang nagtapos sa School-Based Feeding Program upang mapanatili ang kanilang pagbuti ng kalagayang pangnutrisyon.
Sinabi ni David na nakatulong ang tuloy-tuloy na pagpapatupad ng mga nutrition program sa pagbaba ng bilang ng mga batang may malnutrisyon sa Odiongan ngayong taon kumpara noong 2025.
Hinikayat din niya ang mga magulang na samantalahin ang mga serbisyong pangnutrisyon ng pamahalaan at binigyang-diin na nagsisimula ang wastong nutrisyon habang nasa sinapupunan pa lamang ang bata.
“Alagaan natin ang ating mga anak simula pa lamang sa pagbubuntis. Samantalahin natin ang mga programang ibinibigay ng pamahalaan upang matiyak na sila ay lumaking malusog,” aniya.
