Nadagdagan ang talaan ng mga endemic species sa Sibuyan Island matapos matuklasan ng mga siyentipiko ang isang bagong uri ng gecko na matatagpuan lamang sa isla.
Ang bagong species na Luperosaurus alvarezi, isang fringed forest gecko, ay inilarawan sa international peer-reviewed journal na PeerJ matapos ang isinagawang morphological at molecular analyses ng mga mananaliksik na sina Camila Meneses at Rafe Brown.
Ayon sa Department of Environment and Natural Resources (DENR) MIMAROPA, ang pagtuklas ay nagpapatibay sa pagkilala sa Sibuyan Island bilang isa sa pinakamahahalagang biodiversity areas sa Pilipinas at nagpapakita ng kahalagahan ng patuloy na pangangalaga sa mga natitirang kagubatan nito.
Pinangalanan ang bagong species bilang Luperosaurus alvarezi bilang pagkilala sa yumaong Filipino taxonomist at ecologist na si Dr. James D. V. Alvarez dahil sa kanyang ambag sa pananaliksik at konserbasyon ng biodiversity sa bansa.
Nabatay ang pag-aaral sa mga specimen na nakolekta sa kagubatan ng Sibuyan Island, kabilang ang Mount Guiting-Guiting Natural Park, isa sa mga pangunahing protected area sa Pilipinas na kilala sa mataas na antas ng biodiversity at endemism.
Nauna nang inanunsyo ng mga siyentipiko ang pagkakatuklas ng Platymantis guiting, isa ring endemic frog species sa Sibuyan, na nagpapakita na nananatiling mahalagang lugar ang isla para sa pagtuklas ng mga bagong species.
Ayon sa pag-aaral, may mga natatanging pisikal na katangian ang Luperosaurus alvarezi na nagpapakita na isa itong hiwalay na evolutionary lineage mula sa iba pang kilalang species ng kaparehong genus.
Binigyang-diin din ng mga mananaliksik ang kahalagahan ng patuloy na pangangalaga sa mga kagubatan ng Sibuyan dahil sa limitadong distribusyon ng bagong species at sa mga banta tulad ng illegal logging, habitat degradation, at iba pang gawaing maaaring makasira sa kalikasan.
Sinabi ng DENR MIMAROPA na patuloy itong nakikipagtulungan sa mga siyentipiko, protected area managers, lokal na pamahalaan, Indigenous Peoples, mga akademikong institusyon, at iba pang conservation partners upang maisulong ang mga programang nakabatay sa siyensya para sa pangangalaga ng biodiversity.
Ayon sa ahensya, ipinakikita ng mga bagong tuklas na nananatiling isa ang Pilipinas sa mga bansang may pinakamataas na biodiversity sa mundo at mahalaga ang pagpapatuloy ng mga biodiversity assessment, scientific research, at conservation initiatives upang maprotektahan ang mga natatanging species at kanilang mga tirahan.
