Ang lalawigan ng Romblon ang magsisilbing host ng 52nd National Nutrition Month Regional Launching sa MIMAROPA sa Hulyo 7 na gaganapin sa Romblon State University sa Odiongan.
Pangungunahan ng National Nutrition Council (NNC)-MIMAROPA ang paglulunsad ng pagdiriwang katuwang ang Department of Health (DOH)-MIMAROPA, Pamahalaang Panlalawigan ng Romblon, at Pamahalaang Bayan ng Odiongan.
Ayon kay NNC MIMAROPA Nutrition Officer III Keren Faye Gaya, tampok sa pagdiriwang ngayong taon ang ugnayan ng wastong nutrisyon, pangangalaga sa kalikasan, at food security.
“Bago natin pag-usapan ang balanced diet at healthy food, dapat muna nating pag-usapan ang healthy ecosystem, healthy environment, healthy soil, at clean water. Diyan nagsisimula ang nutrisyon,” ani Gaya.
Bilang bahagi ng regional launching, magsasagawa ang NNC at mga katuwang nitong ahensya ng mga information-sharing session upang palawakin ang kaalaman ng publiko sa kahalagahan ng pangangalaga sa kapaligiran sa pagpapanatili ng sapat at masustansyang suplay ng pagkain.
Sinabi ni Gaya na layunin ng kampanya na suportahan ang mga programa ng pamahalaan sa pagpapalakas ng food security at pag-iwas sa kagutuman sa pamamagitan ng wastong pangangalaga sa likas na yaman.
Samantala, sinimulan na rin ng mga lokal na pamahalaan sa Romblon ang kani-kanilang mga aktibidad para sa Nutrition Month bilang pakikiisa sa regional celebration.
Sa Odiongan, inilunsad ng Municipal Nutrition Committee sa pangunguna ni Mayor Roger Fodra Jr., katuwang ang Barangay Nutrition Committees ng 25 barangay, ang iba't ibang aktibidad na nagsusulong ng wastong nutrisyon at pangangalaga sa kalikasan.
Naglagay rin ng Nutrition Month tarpaulins sa municipal hall at sa lahat ng barangay bilang suporta sa taunang kampanya at sa pagpapatibay ng mga nutrition program sa komunidad.
Binigyang-diin din ni Gaya ang mahalagang papel ng mga lokal na pamahalaan sa pagtugon sa kagutuman sa pamamagitan ng pagpapatupad ng mga community-based nutrition program at pagpapalakas ng lokal na food systems.
Batay sa pinakahuling survey ng Department of Science and Technology–Food and Nutrition Research Institute (DOST-FNRI), nasa 2.9 porsiyento ng mga kabahayan sa MIMAROPA ang nakaranas ng involuntary hunger o kawalan ng makain kahit minsan sa itinakdang reference period.
Bagama't wala pang hiwalay na datos para sa Romblon, sinabi ni Gaya na ipinakikita ng resulta ang pangangailangan ng patuloy na pagtutulungan ng mga lokal na pamahalaan, pambansang ahensya, at mga komunidad upang mapalakas ang food security at mabawasan ang kagutuman sa rehiyon.
Mapapanood nang live ang regional launching sa Hulyo 7 sa opisyal na Facebook pages ng National Nutrition Council at Philippine Information Agency MIMAROPA.
