Patuloy na pinalalakas ng Libertad National High School (LNHS) ang school garden program nito upang masuportahan ang School-Based Feeding Program, mapabuti ang nutrisyon ng mga mag-aaral, at isulong ang food security sa paaralan at komunidad.
Ayon kay Libertad NHS Principal IV Vilma Dahan, ginagamit ang mga gulay na inaani sa school garden bilang sangkap sa feeding program at mga pagkain sa school canteen. Ang ilan sa mga ani ay ipinamamahagi rin sa mga mag-aaral upang maiuwi sa kanilang mga pamilya.
Kabilang sa mga itinatanim sa paaralan ang upo, pipino, pechay, kalabasa, at sigarilyas sa ilalim ng Technology and Livelihood Education (TLE) classes, kung saan mahigit 90 estudyante ang aktibong nakikilahok sa pagtatanim.
Sinabi ni Dahan na layunin ng programa na hindi lamang makapagbigay ng pagkain kundi maturuan din ang mga mag-aaral ng mga kasanayan sa pagtatanim na maaari nilang magamit sa kanilang tahanan at komunidad.
“Ang number one objective ng school ay matutuhan talaga nila ang skills sa pagtatanim. Dapat hindi nila makalimutan at ma-value pa rin nila ang vegetable production bilang bahagi ng suporta sa food security,” ani Dahan.
Bagama't limitado ang ani dahil sa kakulangan ng suplay ng tubig, sinabi niyang nakatutulong pa rin ang school garden sa feeding program, school canteen, at iba pang aktibidad ng paaralan.
Bukod sa school garden, ipinatutupad din ng Libertad NHS ang Adopt-a-Student initiative upang matulungan ang mga mag-aaral na nahihirapang matustusan ang kanilang pagkain at iba pang pangunahing pangangailangan.
Ayon kay Dahan, tinutukoy ng mga guro ang mga benepisyaryo sa pamamagitan ng home visits at panayam, at boluntaryong nagbibigay ng pagkain at iba pang tulong.
“Kapag nalaman naming walang baon o walang pambili ng pagkain ang bata, sinasabihan lang kami at binibigyan namin siya ng pang-lunch,” aniya.
Bagama't hindi pa pormal na institusyonalisado ang programa, sinabi ni Dahan na maraming guro ang kusang tumutulong sa isa o dalawang mag-aaral upang matiyak na makapagpatuloy sila sa kanilang pag-aaral.
Ayon sa paaralan, bahagi ang school garden program ng patuloy nitong pagsusulong ng food security, pagpapabuti ng nutrisyon ng mga mag-aaral, at pagpapalawak ng kaalaman sa sustainable food production.
Discussion about this post