Nakipagpulong ang mga opisyal ng National Commission of Senior Citizens (NCSC) sa mga alkalde ng 17 bayan ng Romblon, kasama si Romblon Lone District Representative Eleandro Jesus “Budoy” Madrona, mga miyembro ng Sangguniang Panlalawigan, at iba pang lokal na opisyal upang talakayin ang pagpapatupad ng mga programa para sa mga nakatatandang mamamayan sa lalawigan.
Sa pagpupulong, ibinahagi ng NCSC ang mga obserbasyon nito matapos ang pagbisita sa mga Senior Citizen Centers at pakikipagdayalogo sa mga pinuno ng Office of the Senior Citizens Affairs (OSCA) at mga samahan ng senior citizens sa iba't ibang bayan ng Romblon.
Kabilang sa mga tinalakay ang kasalukuyang kalagayan ng mga serbisyong ipinagkakaloob sa mga senior citizen at ang mga hamong kinakaharap ng mga lokal na pamahalaan sa pagpapatupad ng mga programa para sa sektor.
Isa sa mga isyung napag-usapan ang mga limitasyon sa implementasyon ng social pension program para sa mga nakatatandang mamamayan.
Ayon sa NCSC, susuriin ng komisyon ang mga isyung inilahad ng mga lokal na opisyal at pag-aaralan ang mga posibleng hakbang upang higit pang mapalakas ang pagpapatupad ng mga programa at serbisyong nakalaan para sa senior citizens.
Layunin ng pagpupulong na mapalawak ang koordinasyon sa pagitan ng NCSC at mga lokal na pamahalaan upang matugunan ang mga pangangailangan ng mga nakatatanda at mapahusay ang paghahatid ng mga serbisyo sa lalawigan.
