Hinikayat ni Romblon Lone District Representative Eleandro Jesus “Budoy” Madrona ang 681 nagtapos ng Romblon State University (RSU) mula sa limang campus ng unibersidad na gamitin ang kanilang natamong edukasyon upang maging katuwang sa pagpapaunlad ng lalawigan at ng bansa.
Inihatid ng kongresista ang kanyang mensahe sa 50th Commencement Exercises ng RSU para sa mga nagtapos mula sa Calatrava, San Andres, San Agustin, Santa Maria, at Santa Fe campuses na ginanap noong Hunyo 19 sa The Dome sa San Agustin.
Sa kanyang talumpati, sinabi ni Madrona na naniniwala siyang naihanda ng mga paaralan ang mga nagsipagtapos upang harapin ang mga hamon sa kanilang mga napiling propesyon at sa hinaharap.
Binigyang-diin din niya ang kahalagahan ng patuloy na pamumuhunan ng pamahalaan sa edukasyon, na aniya'y isa sa mga pangunahing salik sa pag-unlad ng isang komunidad.
“We are investing in education because for us, this is the best driver for development that the government should focus on,” ani Madrona.
Hinimok din niya ang mga bagong graduate na maging katuwang sa pagpapaunlad ng Romblon at ng bansa.
“Kayo po ang aking inaasahan na magiging katuwang sa pagpapaunlad ng ating mahal na lalawigan at bansa. Kayo ang aming pag-asa, and we are expecting na hindi ninyo kami bibiguin,” aniya.
Binanggit din ni Madrona ang mga naitalang tagumpay ng sektor ng edukasyon sa lalawigan, kabilang ang mataas na literacy rate ng DepEd Romblon at ang patuloy na pagkilala sa Romblon State University sa iba't ibang larangan.
Ipinahayag din niya ang kanyang kasiyahan sa patuloy na pagbuti ng performance ng RSU sa mga licensure examinations, partikular sa Criminology, at tiniyak ang patuloy na suporta sa mga review program para sa mga kukuha ng board examinations.
Hinimok din ng kongresista ang mga nagsipagtapos na pahalagahan ang sakripisyo ng kanilang mga magulang at iba pang tumulong sa kanilang pag-aaral at huwag kalimutang tumulong sa kanilang pamilya.
Kasabay nito, nagpaabot siya ng pagbati sa mga magulang, guardian, guro, at mga administrador ng unibersidad para sa kanilang naging bahagi sa pagtatagumpay ng Batch Tangluyan.
Ayon sa tanggapan ni Madrona, patuloy nitong isusulong ang mga programang naglalayong mapalawak ang access sa dekalidad na edukasyon para sa mga kabataang Romblomanon.
Discussion about this post