Matapos ang halos limang taong paglilitis, nagpasya ang Court of Tax Appeals (CTA) Third Division na ipawalang-bisa ang mahigit ₱19.4 milyong buwis na kinokolekta ng Bureau of Internal Revenue (BIR) laban kay Shirley Tan Festin, isang negosyanteng taga-Cajidiocan, Romblon na may-ari ng CSR Construction and Supply.
Sa desisyon na inilabas noong nakaraang buwan, iginiit ng Korte na hindi napatunayan ng BIR na naihatid at natanggap ng negosyante ang Formal Letter of Demand at Final Assessment Notice (FLD/FAN), na siyang batayan ng sinasabing tax assessment para sa taong 2014.
Dahil dito, binigyang-diin ng CTA na nilabag ng BIR ang karapatan ng negosyante sa due process, alinsunod sa Section 228 ng National Internal Revenue Code.
Bunsod ng kawalan ng bisa ng assessment, idineklara rin ng CTA na null ang mga ipinatupad na Warrant of Distraint and/or Levy at Warrants of Garnishment laban kay Festin. Kasama rito ang mga bank account sa Development Bank of the Philippines, Land Bank, Philippine National Bank, at Community Rural Bank of Romblon na unang pinigil ng BIR upang singilin ang umano’y pagkakautang sa buwis.
Sa kabuuan, umaabot sa ₱19,426,405.22 ang sinisingil ng BIR, kabilang ang income tax, value-added tax (VAT), expanded withholding tax (EWT), at iba pang multa para sa taxable year 2014.
Sa naging paglilitis, mariing igininiit ng kampo ni Festin na ang buwis ay batay sa hindi beripikadong third-party information at hindi sila nabigyan ng patas na pagkakataon upang ipagtanggol ang kanilang panig. Samantala, giit naman ng BIR, naipadala umano ang mga abiso, ngunit nabigo itong magpakita ng sapat na ebidensiya upang patunayan ito.
Sinubukan naming kunin ang pahayag ni Atty. Jay G. Masangcay, abogado ni Festin, ngunit tumanggi itong magbigay ng karagdagang detalye kaugnay ng kaso.
