Kinilala ng mga opisyal ng lalawigan ng Romblon ang mahalagang ambag ng mga Child Development Worker (CDW) sa paghubog ng mga batang Romblomanon sa isinagawang 2026 Child Development Workers Convention sa bayan ng Calatrava.
Sa kanyang mensahe, sinabi ni Governor Trina Alejandra Firmalo-Fabic na mahalagang bahagi ng paghubog sa mga bata ang pagtuturo ng mga pangunahing pagpapahalaga at wastong pag-uugali tulad ng maayos na pagpila at tamang pagtatapon ng basura. Tinalakay rin niya ang ilang benepisyong ipinagkakaloob para sa mga Child Development Worker sa lalawigan.
Samantala, nagpahayag naman ng pasasalamat si Congressman Eleandro Jesus Madrona sa mga CDW para sa kanilang patuloy na paglilingkod sa mga komunidad at sa kanilang papel sa paghahanda ng mga bata para sa pag-aaral.
Ayon kay Madrona, malaki ang responsibilidad na ginagampanan ng mga Child Development Worker sa kabila ng limitadong honorarium na kanilang natatanggap. Inihalintulad din niya ang mga CDW sa mga karpintero dahil ang kanilang pagtuturo sa murang edad ay nagsisilbing pundasyon sa paghubog ng kinabukasan ng mga bata.
Ang Child Development Workers Convention ay bahagi ng mga aktibidad na naglalayong palakasin ang kakayahan ng mga CDW at kilalanin ang kanilang ambag sa early childhood education at development sa lalawigan.
