Tiniyak ni Pangulong Ferdinand R. Marcos Jr. na kanyang pagtutuunan ng pansin ang pag-aalis ng katiwalian sa mga proyektong pang-imprastraktura ng pamahalaan, dahil hindi lamang ito nagdudulot ng mga depektibong proyekto kundi nagreresulta rin sa malaking pagkalugi sa ekonomiya na direktang nakakaapekto sa mga ordinaryong mamamayan.
Sa kanyang pagbisita sa Tuba, Benguet nitong Linggo, sinuri ng Pangulo ang nabigong multi-milyong pisong rock shed at rock netting projects sa kahabaan ng Kennon Road sa Barangay Camp 4.
Batay sa kanyang ulat, aabot na sa 35 porsyento ang epekto ng pinsala ng P264-milyong rock shed project sa lokal na ekonomiya. Tinatayang aabot naman sa hindi bababa sa P500 milyon ang maaaring gugulin ng pamahalaan para sa pagkukumpuni nito.
Inutusan din ng Pangulo ang Department of Public Works and Highways (DPWH) na ibalik ang standard operating procedure (SOP) kung saan kinakailangang tanggapin muna ng mga lokal na pamahalaan ang proyekto bago ideklarang kumpleto. Layunin nitong maiwasan ang katiwalian at matiyak na maayos ang kalidad ng mga proyektong itinatayo.
Binanggit din ng Pangulo na ipinagbawal na ang rock netting projects dahil sa pagiging bulnerable nito sa katiwalian, subalit ipinagpatuloy pa rin umano ang implementasyon ng naturang proyekto.
Sa kanyang inspeksiyon, ibinahagi ng Pangulo na ang presyo ng mesh na ginamit para sa rock netting ay aabot lamang sa ₱3,200 bawat isa batay sa supplier, ngunit siningil ito sa gobyerno ng hanggang ₱12,000 bawat isa.
Sakop ng nasabing proyekto ang 3,479 square meters ng slope na tinakpan ng 3-millimeter high tensile wire mesh na may green mat para sa erosion control. Natapos ito mula Abril 2018 hanggang Hunyo 2019 sa halagang ₱114.177 milyon at iginawad sa 3K Rock Engineering—na siya ring kontratista ng rock shed project.
Nakita sa ginawang inspeksiyon na may ilang bahagi ng mesh ang sira o hindi nasa tamang kondisyon, dahilan upang idiin ng Pangulo na kailangan nang itama ang mga ganitong uri ng abuso na nag-ugat sa maling sistema at pandaraya sa pagpapatupad ng proyekto.
