Pinaalalahanan ng Land Transportation Office (LTO) Romblon ang publiko hinggil sa tatlong buwang pagpapalawig ng bisa ng mga lisensya at rehistro ng sasakyan alinsunod sa direktiba ng pambansang pamahalaan kaugnay ng naranasang krisis sa Gitnang Silangan.
Ayon sa LTO, nagpalabas ang ahensya ng memorandum circular na nagpapalawig ng bisa ng mga dokumentong nakatakdang mag-expire simula Abril 2026 sa loob ng karagdagang tatlong buwan.
Saklaw ng pagpapalawig ang driver's license, conductor's license, student-driver's permit, at motor vehicle registration.
Ipinaliwanag ng LTO na bahagi ito ng whole-of-government response na iniutos ni Pangulong Ferdinand R. Marcos Jr. upang mabawasan ang epekto ng pagtaas ng presyo ng langis at iba pang pangunahing bilihin dulot ng tensyon sa Gitnang Silangan.
Sa ilalim ng polisiya, hindi papatawan ng surcharge, penalty, o multa ang mga may-ari ng dokumentong magre-renew sa loob ng itinakdang extension period.
Ayon kay Jocelyn Rilo, hepe ng LTO Romblon, sa ginanap na 2nd Quarter Provincial Peace and Order Council (PPOC) meeting sa Odiongan kamakailan, layunin ng hakbang na mabigyan ng sapat na panahon ang mga motorista at iba pang kliyente ng ahensya upang maisagawa ang kanilang renewal nang hindi nadaragdagan ang kanilang gastusin sa kasalukuyang sitwasyon.
Gayunman, hinihikayat ng LTO ang mga motorista at may-ari ng sasakyan na kabilang sa mga dokumentong mag-e-expire sa mga sakop na petsa na mag-renew pa rin sa lalong madaling panahon kung may kakayahan na silang gawin ito, upang maiwasan ang posibleng pagsisiksikan ng mga aplikante sa pagtatapos ng extension period.
Hinimok din ng ahensya ang mga motorista na samantalahin ang extension period at tiyaking maisasagawa ang renewal ng kanilang mga dokumento bago matapos ang pinalawig na bisa nito.
Discussion about this post