Mahigit triple ang itinaas ng bilang ng mga turistang nag-island hopping sa bayan ng Calatrava sa unang apat na buwan ng 2026 kumpara sa kaparehong panahon noong nakaraang taon, batay sa datos ng Municipal Tourism Office.
Sa panayam sa Kapihan sa PIA Romblon, sinabi ni Calatrava Mayor Robert Fabella na nakapagtala ang bayan ng 2,345 island-hopping tourists mula Enero hanggang Abril 2026, mas mataas kumpara sa 809 turista na naitala sa parehong panahon noong 2025.
Sa kabuuang bilang ngayong taon, 2,259 ay lokal na turista habang 86 naman ang dayuhang bumisita sa mga isla at destinasyon ng bayan.
Noong Enero hanggang Abril 2025, umabot lamang sa 779 ang lokal na turista at 30 naman ang dayuhang turista na nagbayad ng environmental fee para sa island-hopping activities.
Ayon kay Fabella, nagpapakita ang datos ng pagtaas ng bilang ng mga turistang bumibisita sa Calatrava kasunod ng mga isinagawang tourism promotion at iba pang hakbang ng lokal na pamahalaan upang ipakilala ang mga atraksyon ng bayan.
Gayunman, sinabi ng alkalde na hindi pa kabilang sa datos ang mga turistang direktang nagtutungo sa mga resort, hotel, at iba pang accommodation establishments na hindi dumaraan sa Municipal Tourism Office.
Dahil dito, inaasahan niyang mas mataas pa ang aktuwal na bilang ng mga turistang bumibisita sa bayan kaysa sa naitalang bilang ng mga nagbayad ng environmental fee para sa island-hopping activities.
Patuloy namang isinusulong ng lokal na pamahalaan ang pagpapaunlad ng sektor ng turismo sa Calatrava sa pamamagitan ng pagpapaganda ng mga pasilidad at promosyon ng mga likas na atraksyon sa bayan.
