Kabuuang 68 aplikante ang agad na natanggap sa trabaho sa isinagawang Independence Day Job Fair ng Department of Labor and Employment (DOLE) sa mga bayan ng Romblon at Looc noong Hunyo 12.
Batay sa datos ng DOLE Romblon, umabot sa 107 job seeker ang nagparehistro sa dalawang job fair na isinagawa sa lalawigan.
Sa bayan ng Romblon, 54 na aplikante ang nagparehistro at 42 sa kanila ang na-hire on the spot, katumbas ng placement rate na 77.77 porsiyento.
Samantala, 53 naman ang nagparehistro sa job fair sa Looc at 26 sa kanila ang agad na natanggap sa trabaho, na may placement rate na 49.05 porsiyento.
Ayon kay Ronald Geronimo ng Romblon Public Employment Service Office (PESO), kabilang sa mga natanggap sa trabaho sa bayan ng Romblon ang ilang graduating college students na nakatakdang magtapos ngayong linggo.
Sinabi ni Geronimo na may mga nagtapos na magkakaroon agad ng oportunidad sa trabaho bago pa man matanggap ang kanilang diploma.
Ang Independence Day Job Fair ay bahagi ng programa ng pamahalaan upang mapag-ugnay ang mga naghahanap ng trabaho at mga employer na may bakanteng posisyon.
Sa buong rehiyon ng MIMAROPA, iniulat ng DOLE na umabot sa 189 aplikante ang na-hire on the spot sa mga job fair na isinagawa kasabay ng pagdiriwang ng Araw ng Kalayaan.
Layunin ng programa na mapalawak ang access ng mga mamamayan sa mga oportunidad sa trabaho at matulungan ang mga employer na mapunan ang kanilang mga pangangailangan sa manggagawa.
