Naisali ang mga pampublikong pamilihan ng San Agustin, Looc, at Odiongan sa ikalawang taon ng Pamilihang Bayan ng Bidang Mamimili (PBBM) o Search for Best Public Market ng Department of Trade and Industry (DTI) MIMAROPA.
Bilang bahagi ng assessment at validation process ng programa, nagsagawa ang DTI Romblon ng pagsusuri sa tatlong pamilihan upang suriin ang pagsunod ng mga ito sa mga pamantayan sa kalinisan, kaayusan, kaligtasan, at kalidad ng serbisyo sa publiko.
Pinangunahan ni DTI Romblon Provincial Director Orville Mallorca ang pagsusuri sa Looc Public Market noong Hunyo 9 kasama ang mga kinatawan ng lokal na pamahalaan, market personnel, at mga vendor.
Sumailalim din sa kaparehong pagsusuri ang mga pampublikong pamilihan ng San Agustin at Odiongan bilang bahagi ng kanilang paglahok sa programa.
Ayon sa DTI, layunin ng assessment na matukoy ang mga pamilihang nagpapatupad ng mahusay na pamamahala at mga programang nakatutulong sa mga mamimili, negosyante, at lokal na komunidad.
Ang Pamilihang Bayan ng Bidang Mamimili ay isa sa mga programa ng DTI MIMAROPA na naglalayong kilalanin ang mga lokal na pamahalaan na nagpapanatili ng maayos, malinis, ligtas, at episyenteng pampublikong pamilihan.
Sa pamamagitan ng programa, hinihikayat ang mga lokal na pamahalaan na patuloy na pagandahin ang kanilang mga pasilidad, serbisyo, at mga polisiya upang mapakinabangan ng mga mamimili at negosyante.
