Naghahanda ang Department of Science and Technology (DOST) Romblon para sa paglulunsad ng isang solar-powered electric vehicle charging facility sa bayan ng Romblon bilang bahagi ng pagsusulong ng renewable energy at sustainable transportation technologies sa lalawigan.
Bilang paghahanda sa implementasyon ng proyekto, nagsagawa ang DOST Romblon, sa pakikipagtulungan ng Lokal na Pamahalaan ng Romblon at Barangay II, ng pagsasanay para sa mga tauhan ng barangay hinggil sa operasyon at maintenance ng Solar-Powered Charging in Minutes (CharM) technology.
Layunin ng pagsasanay na mabigyan ang mga kalahok ng kaalaman at kasanayan sa wastong paggamit, pangangalaga, at pamamahala ng charging facility kapag ito ay naging ganap nang operational.
Ang CharM o Charging in Minutes ay isang locally developed fast-charging technology na idinisenyo upang suportahan ang lumalawak na paggamit ng electric vehicles sa bansa. Sa ilalim ng sistemang ito, nababawasan ang charging time mula apat hanggang anim na oras tungo sa humigit-kumulang 30 minuto.
Ipinatutupad ang proyekto sa ilalim ng ikalawang yugto ng Smart and Sustainable Communities Program ng DOST, na naglalayong isulong ang paggamit ng mga makabago at environment-friendly na teknolohiya sa mga komunidad.
Naglaan naman ang Municipal Government of Romblon ng lugar kung saan itatayo ang solar-powered charging facility sa koordinasyon ng Barangay II.
Sa isinagawang pagsasanay, tinalakay ang mga tungkulin ng charging system, wastong operating procedures, basic troubleshooting, at maintenance requirements upang matiyak ang maayos na operasyon ng pasilidad sa hinaharap.
Ayon sa DOST Romblon, layunin ng proyekto na hikayatin ang paggamit ng mga alternatibong transportasyong gumagamit ng malinis na enerhiya at mapalawak ang kaalaman ng publiko tungkol sa renewable energy technologies.
Nakatakdang ilunsad ang solar-powered CharM technology mula Hulyo 29 hanggang 31 kasabay ng Regional Science, Technology, and Innovation Week (RSTW) 2026 na gaganapin sa Odiongan, Romblon.
Discussion about this post