Gagamitin ng Lokal na Pamahalaan ng Calatrava ang P25 milyong pondo mula sa Local Government Support Fund (LGSF) para sa pagpapagawa ng access road na mag-uugnay sa national road at Sitio Lantangan sa Barangay Balogo.
Sa panayam sa Kapihan sa PIA Romblon, sinabi ni Calatrava Mayor Robert Fabella na bahagi ang proyekto ng kabuuang P30 milyong LGSF allocation na natanggap ng munisipyo mula sa pambansang pamahalaan.
Ayon sa alkalde, P25 milyon ang inilaan para sa infrastructure project habang P5 milyon naman ang nakalaan para sa rice subsidy program.
Sinabi ni Fabella na mahalaga ang access road project dahil magsisilbi itong daanan ng mga residente ng Sitio Lantangan at magbibigay ng mas maayos na koneksyon patungo sa iba't ibang pasilidad at establisimyento sa bayan.
Aniya, kabilang din sa mga planong makikinabang sa proyekto ang sanitary landfill ng munisipyo na nais paunlarin ng lokal na pamahalaan bilang isang lugar na maaaring paglagyan ng mga ornamental plants at iba pang landscape features.
Dagdag pa niya, may mga residente nang naninirahan sa lugar at inaasahang mas mapapadali ang kanilang pagbiyahe kapag natapos ang kalsada.
Binanggit din ni Fabella na may lupain ang Romblon State University sa nasabing lugar na maaari ring makinabang sa proyekto sakaling magkaroon ng mga susunod na development sa hinaharap.
Ayon sa alkalde, pinili ng lokal na pamahalaan na ituon ang pondo sa isang pangunahing proyekto upang mas makita at maramdaman ng mga residente ang epekto nito sa komunidad.
Ikinatuwa rin ni Fabella ang pagkakaloob ng Local Government Support Fund dahil nagbibigay ito ng karagdagang mapagkukunan ng pondo para sa mga prayoridad na proyekto ng mga munisipalidad.
Aniya, para sa mga maliliit na lokal na pamahalaan tulad ng Calatrava, malaking tulong ang mga support fund mula sa pambansang pamahalaan sa pagpapatupad ng mga proyektong pangkaunlaran.
Ang Local Government Support Fund ay isa sa mga programa ng pambansang pamahalaan na nagbibigay ng pondo sa mga lokal na pamahalaan para sa mga proyektong may kaugnayan sa imprastraktura, food security, at iba pang serbisyong pangkomunidad.
