Pinaiigting ng Land Transportation Office (LTO) Romblon at Romblon Police Provincial Office (RPPO) ang pagpapatupad ng mga batas-trapiko sa lalawigan upang mabawasan ang bilang ng mga aksidente sa kalsada.
Sa ginanap na Provincial Peace and Order Council (PPOC) meeting, iniulat ng LTO na mayroon nang mga deputized personnel mula sa Odiongan Municipal Police Station na awtorisadong mag-isyu ng citation tickets laban sa mga lumalabag sa mga batas-trapiko.
Ayon kay LTO Romblon Chief Jocelyn Rillo, maaaring magbigay ng citation tickets ang mga deputized personnel sa mga motorista na mahuhuling nagmamaneho nang walang lisensya, may hindi rehistradong sasakyan, at lumalabag sa iba pang regulasyon sa kalsada kabilang ang pagmamaneho habang nasa impluwensya ng alak.
Sinabi rin ni Rillo na humiling ang Romblon Police Provincial Office sa regional office ng LTO ng karagdagang personnel na maaaring ma-deputize upang mapalawak ang pagpapatupad ng mga batas-trapiko sa iba't ibang bahagi ng lalawigan.
Dahil sa pagkakaroon ng mga deputized personnel, nagsagawa rin ang Odiongan Municipal Police Station ng mas pinaigting na checkpoint operations sa iba't ibang bahagi ng bayan, partikular sa gabi kung kailan karaniwang naitatala ang mga aksidente sa kalsada.
Layunin ng mga operasyon na matukoy ang mga motorista na lumalabag sa batas-trapiko at mapigilan ang mga insidenteng may kaugnayan sa reckless driving, pagmamaneho nang walang lisensya, at pagmamaneho habang nasa impluwensya ng alak.
Batay sa datos ng Romblon PPO, nakapagtala ang lalawigan ng 115 road crash incidents mula Enero 1 hanggang Hunyo 15, 2026.
Mas mababa ito ng 33 insidente o 22.30 porsiyento kumpara sa 148 road crash incidents na naitala sa kaparehong panahon noong 2025.
Ipinakita rin sa datos na ang Odiongan Municipal Police Station ang may pinakamataas na naitalang bilang ng aksidente sa kalsada na may 51 kaso ngayong taon, bagamat mas mababa ito kumpara sa 78 kaso noong nakaraang taon.
Nakapagtala rin ng 20 kaso ang San Fernando, tig-walong kaso ang Romblon at Ferrol, anim na kaso ang San Agustin, habang may mga naitala ring insidente sa iba pang bayan sa lalawigan.
Samantala, sinabi ng Provincial Health Office (PHO) na isa sa mga pangunahing dahilan ng pagkasawi ng mga biktima ng road crash incidents sa lalawigan ay ang hindi pagsusuot ng helmet ng mga motorcycle rider.
Ayon sa PHO, mas mataas ang posibilidad ng malubhang head injury at pagkamatay sa mga aksidente kapag walang suot na protective helmet ang rider at back rider.
Dahil dito, muling nanawagan ang mga awtoridad sa mga motorista na mahigpit na sumunod sa Motorcycle Helmet Act at iba pang batas-trapiko upang mabawasan ang panganib ng malubhang pinsala at pagkasawi sa oras ng aksidente.
