Malapit nang matapos ang pagsasaayos ng pampublikong pamilihan ng Calatrava matapos simulan ng lokal na pamahalaan ang rehabilitasyon nito noong nakaraang taon, ayon kay Mayor Robert “Bong” Fabella.
Sa panayam sa Kapihan sa PIA Romblon, sinabi ni Fabella na noong 2012 pa huling sumailalim sa major renovation ang public market ng bayan kaya isinama niya ito sa mga prayoridad na proyekto nang maupo bilang alkalde noong 2025.
Ayon sa alkalde, kabilang sa mga isinagawang pagpapabuti ang pagpapalit ng mga lumang pasilidad sa wet market, kabilang ang mga lababo na ginawang stainless steel upang maging mas matibay at madaling linisin.
Sinabi rin niya na sinimulan nang gamitin ng mga tindero at mamimili ang wet market section ngayong linggo bilang bahagi ng testing period bago tuluyang tanggapin ng lokal na pamahalaan ang proyekto.
Layunin ng hakbang na matukoy agad kung may mga depekto o bahagi ng proyekto na nangangailangan pa ng pagkukumpuni bago ito opisyal na tanggapin.
“Pinasimulan ko nang ipagamit ang wet market para masiguradong walang deperensya bago natin i-accept ang project,” ani Fabella.
Dagdag pa niya, prayoridad din ng lokal na pamahalaan ang pagpapanatili ng kalinisan sa loob ng pamilihan. Aniya, nagsisimula ang paglilinis ng mga nakatalagang kawani bago mag-alas-sais ng umaga upang matiyak na maayos ang kondisyon ng palengke sa pagbubukas nito.
Kasunod ng wet market, nakatakda ring buksan sa mga negosyante at mamimili ang dry section ng pamilihan upang sumailalim din sa pagsusuri bago ang pormal na turnover at acceptance ng proyekto.
Ayon kay Fabella, nais niyang makuha muna ang puna at rekomendasyon ng mga gumagamit ng pasilidad bago ito opisyal na tanggapin ng lokal na pamahalaan.
Kabilang din sa mga isinagawang pagbabago sa pamilihan ang pagpapalapad ng mga hallway sa wet market upang magkaroon ng mas maluwag na daanan para sa mga mamimili at tindero.
Kapag natapos ang pagsusuri at wala nang kailangang baguhin sa proyekto, saka pa lamang isasagawa ang pormal na pagtanggap at inagurasyon ng renovated public market.
