Ipinahayag ni Odiongan Mayor Trina Firmalo-Fabic ang kanyang matibay na suporta para sa Masungi Georeserve, habang binibigyang-diin ang kahalagahan ng konserbasyon at sustainable development.
Sa isang pahayag na inilathala sa pamamagitan ng Angat Bayi Facebook Page, binigyang-diin ni Firmalo-Fabic ang koneksyon ng kalikasan sa buhay ng tao at ang pangangailangang protektahan ang biodiversity. Ipinunto rin niya ang Masungi bilang modelo ng pangangalaga sa kalikasan at ng sustainable development.
“Recent challenges emphasize the need for stronger collaboration between conservation advocates and institutions, ensuring that initiatives like Masungi receive the protection and recognition they deserve,” pahayag ni Firmalo-Fabic.
Ang kanyang pahayag ay kaugnay ng paglalabas ng Department of Environment and Natural Resources (DENR) ng eviction notice laban sa Blue Star Construction & Development Corporation, ang developer ng Masungi Georeserve, na inuutusang lisanin ang Lot 10 kung saan matatagpuan ang conservation area.
Nanawagan si Firmalo-Fabic ng dayalogo sa pagitan ng mga stakeholders at binigyang-diin ang kahalagahan ng paghubog ng bagong henerasyon ng mga environmentalist na dedikado sa pangangalaga ng mga kagubatan, karagatan, at iba pang likas na yaman.
“I stand with Masungi Georeserve and all those dedicated to protecting our environment because safeguarding nature is key to securing our future,” dagdag pa niya.
Ang Masungi Georeserve, na matatagpuan sa lalawigan ng Rizal, ay isang pangunahing proyekto ng konserbasyon na kilala sa mga inisyatibo nito sa reforestation, eco-tourism, at biodiversity preservation. Gayunpaman, patuloy itong humaharap sa mga legal na hamon sa paglipas ng mga taon, na nagdudulot ng pangamba sa mga tagapagtaguyod ng kalikasan.
Isa si Firmalo-Fabic sa dumaraming bilang ng mga personalidad na nagpapahayag ng suporta para sa Masungi, habang patuloy ang panawagan para sa mas malinaw na polisiya at mas matibay na proteksyon sa kapaligiran.
